叱咤︱炎明熹收起性感樽領上陣　姚焯菲開胸突圍而出

2023年度叱咤樂壇流行榜頒獎典禮今晚在亞博舉行。女歌手今晚（1日）都悉心打扮現身吒咤頒獎禮，日前在新城以超大尺度性感上陣的聲夢人氣王炎明熹（Gigi）之前預告會以重裝出席吒咤，果然無講錯，她身穿湖水綠色皺褶層次紗裙到場，包到上頸長到拖地，密實封胸，不過靚唔靚就見仁見智。至於另一聲夢小花姚焯菲則以黑色連身短裙上陣，主打青春可人。

另外，較為性感的包括嘉欣9896身穿中門大開款黑色短裙；李幸倪穿着露肩開叉裙；陳凱詠以透視裝透黑Bra；劉君冬心口開窿露南北半球最為博；女團COLLAR齊以型格露臍到場；Serrini身穿色低胸裙露事業線，雖然女歌手都谷盡胸，但最好胸的反而是男歌手Tyson Yoshi，逼爆胸肌示人。除以性感搶鏡，也有歌手以騎里打扮出位，其中楊安妮身穿彩色裙加上手持奶樽，造型獨特。

另外，92歲的胡楓亦驚喜登上叱咤頒獎禮台，他甫上台即引來大批歌迷尖叫，他說：「我入行70年㗎喇，我鍾意演戲同唱歌，希望會繼續打破自己紀錄，就係喺紅館舉行演唱會，成為年紀最大一個藝人。有人問我咁多歌。」期間他唱出張學友的《愛是永恆》，之後又續說：「今年嘅一月就係我92歲生日，我希望繼續我嘅演藝事業，永不言休，我希有好多歌陪住我一起生活嘅，最後我希望在座各位身體健康，生活愉快，OK嘛？」全場大叫OK。