黃智雯離巢無綫　做朱茵蔡少芬師妹：好大壓力！

上月約滿離巢無綫的黃智雯（Mandy）回首過去的2023年，對她來說的確是特別的一年，成為人妻後，今日正式宣布加盟「凱藝娛樂」，成為「神級花旦」朱茵與蔡少芬（Ada）的同門師妹。日前Mandy為新一年拍攝造型照，對於加盟新公司大叫興奮表示：「抱正面開放態度，迎接新挑戰。」

展開人生的新階段，她望能突破自己，跳出框架，嘗試從未試過的新事物，她謂：「好多人問我係咪會去演多啲舞台劇，當然舞台劇喺我呢兩年嘗試後，畀到我另一種滿足感，我都想繼續開拓舞台劇上嘅自己，不過我覺得自己有更加多可能性，好想同多啲唔同嘅演員合作，多啲火花，對電影、綜藝節目、真人騷等所有嘢抱開放態度，以樂觀、開放，迎接新挑戰！」

加盟新公司跟朱茵與Ada作為同門，Mandy笑言跟她們早有淵源：「佢哋兩位真心係我好欣賞嘅藝人、女神，其實我哋三個不約而同有相同之處，我同Ada都係Miss HK出道，佢係我師姐，朱茵就係我演藝學院嘅師姐，所以我哋有啲淵源；佢哋又係偶像派，又係女神，非常期待將來我哋可以有更加多合作火花。」問到作為朱茵與Ada的同門師妹可有壓力？Mandy說：「好大壓力，點解佢哋兩個可以keep得咁好、咁靚，我自己都要繼續努力學跳舞同唱歌，令自己更fit，keep更好狀況。」

Mandy透露獲老公及好姊妹對於她有新動向給予支持，她指：「另一半好支持自己，一步一步走來，佢沿途都畀好多意見，我覺得佢係一個好聰明嘅人，成日都會幫我分析，亦係好好嘅聆聽者及心靈夥伴；而姊妹們更加係唔使多講，我哋姊妹間無論大家有咩決定、有咩去向，都會在心中互相支持。」此外，有網民對於Mandy早前「離巢」感傷感一事，她感激所有支持她的人：「唔使傷感，我仲喺度，好多謝大家喺社交平台留言支持及祝福，每一留言我都有睇，好感動。」