XiX頒獎禮獲獎爆喊　郭偉亮：開心佢哋明我教嘅嘢

出道僅四個月的青春少女組合XiX，5位成員中年齡最小只有14歲，其餘主要是16、17歲，近日於頒獎禮上取得好成績，分別新城頒獎禮上奪得「勁爆躍進組合」、及在叱咤樂壇流行榜頒獎典禮勇奪「生力軍組合銀獎」，極有可能是史上最年輕組合奪得此獎項。

對於踏入新一年第一天便得到組合獎項，XiX難以置信以兼喊到豬頭，身為經理人的Eric Kwok（郭偉亮）見狀大笑，但仍難掩興奮喜悅，因五女尚在就學，平日要遷就時間進行宣傳已花盡腦汁，他表示：「我入咗娛樂圈20幾年，我嘅EQ從未試過被挑戰到呢個極限。佢哋出道雖然只有幾個月，但係都身經百戰，加埋比賽經歷，我哋識咗兩年。最開心莫過於我教XiX嘅事情，佢哋可以明白同埋做到出嚟，希望五個女繼續姊妹情深，聽話唔好激我，而且家長都聽聽話話。」XiX聞言亦相當識做賣口乖：「最好答謝Eric Sir嘅方法就係聽聽話話，唔好成日激嬲佢，每次盡100%努力做到佢嘅要求。我哋好想食大餐，請Eric Sir食大餐，終於可以食多啲嘢，哈哈！」