胡諾言孖住老婆推動本地農業　被讚腳頭好

藝人胡諾言(胡仔)與太太陳琪近日為本地漁農美食嘉年華擔任代言人，夫婦二人還孖住出席活動造勢，沿途吸引不少街坊打招呼及影相，熱鬧非常，胡仔表示：「呢度啲攤位入面，好多食材都係本地飼養種植，所以一定要支持(平時都會煮幾味？)我多數都係做買餸嘅角色，太太就係落手煮嘅，今次活動搞得好成功，主辦單位有讚我哋兩公婆腳頭好，希望繼續長做長有啦!頭先經過其中經過一個攤檔，檔主送咗一個揮春，仲同我講撈乜都掂，真係好開心！」

忙於主持無綫節目《流行都市》的他，表示同時為新春節目錄影，又要協助太太主理的網上生活頻道，忙得不可開交，問到農曆年會否外遊？胡仔說：「應該會帶小朋友去滑雪，作為家長都係做跟得爸爸、媽媽，仔女玩得開心我哋就滿足。」