馬德鐘孖太太蜜遊杭州　行山全程拖到實勁恩愛

藝人馬德鐘與太太張筱蘭結婚多年恩愛如初，不時都會喺社交網放閃，晒出夫妻2人嘅甜蜜合照。最近佢哋去到杭州旅遊，馬德鐘就喺社交網分享咗2人行山嘅影片，並寫道：「山頂上的風，聽就覺得自由，最美的風景在路上。」

片中所見佢哋都着晒羽絨，張筱蘭仲戴上帽禦寒，由於當時山上仍有積雪，為咗確保安全，佢哋都揸住登山杖，而相當寵妻嘅馬德鐘仲全程拖實太太，以免佢跌倒。2人邊行邊感受周邊嘅大自然風光，之後又喺夕陽下影合照，認真羨煞旁人！