劉詩詩新劇播完即撇劉宇寧　孖「新歡」頭貼頭上熱搜

內地女星劉詩詩同台灣男神吳奇隆婚變由去年傳到依家未停過，上月佢時隔6年再復出接拍嘅古裝劇《一念關山》播出，同內地上位小生劉宇寧組CP，戲外又獲「徒弟」、26歲小鮮肉常華森秒刪合照惹「緋聞」，拍一套劇就收獲兩大桃花。劉詩詩亦「再接再厲」，接演另一古裝劇《狐妖小紅娘竹業篇》嘅女主角「東方淮竹」，男主角就配上位小生張雲龍，估唔到新劇只係剛剛煞科，就已經有劉詩詩「新歡」。

網上流傳一條劉詩詩頭靠張雲龍肩膀嘅片段，只見兩人含情脈脈，宛如真實戀人，不過今次網友都睇得出只係拍攝路透片，但亦大讚二人夠晒襯，張雲龍高大斯文，同劉詩詩嘅仙氣係絕配，更令「#劉詩詩靠張雲龍肩膀路透#」話題登熱搜，獲近8,000萬次閱讀量，劇未播先炒一波熱度。