同李現「四角戀」大混戰 楊紫疑孖肖戰食飯見家長
2024年01月12日 15:01
東網電視
更多新聞短片
![](/hk/bkn/cnt/entertainment/20240112/photo/bkn-20240112150130073-0112_00862_001_01p.jpg?20240112143207)
內地流量花旦楊紫同小生李現自2019年已傳緋聞,今年元旦更加係一齊過,大家已經分唔清佢哋係戀情定友誼之際,近日二人就各有各新緋聞,仲愈爆愈精彩。二人再次合作嘅新劇《國色芳華》已經正式開拍,眾人都忙喺劇組出入,不過有傳李現偷偷帶咗賣衫網紅曉雪入劇組,全程陪喺佢身邊,更有指已被拍到斷正。雖然合照未被公開,不過李現官方後援會就立刻打假:「ALL假!!女友假!!跟组假!!」幫李現發出單身宣言。
其實早喺去年7月,李現與同曉雪就已經傳緋聞,當時網友搵出4大線索:包括一曉雪同李現上半年行程重疊,1月份兩人社交網IP都喺浙江、4月喺福建、6月喺雲南,而李現去海口睇周杰倫演唱會,女方亦喺現場;二曉雪透露男友係湖北人,李現正係出身湖北;三曉雪曾甫出同暱稱「一休」神秘人嘅聊天紀錄,當時李現就因劇中髮型被指似足「一休」;四曉雪關注李現嘅粉絲頭子,懷疑二人關係不淺。而曉雪去年喺海口睇周杰倫演唱會時,就透露同男友共度浪漫夜晚,不過就因為飛嘅問題被迫分開住,咁啱呢場演唱會後李現就走入後台搵周杰倫合照,令網友對二人有所聯想。
至於楊紫就同頂流小生肖戰傳戀情,二人被發現疑共用同一保母車,就連司機都係同一人,疑似關係密切。點知今日(12日)再有傳二人喺本月5日齊齊打邊爐,更有網友驚呼「和父母喝茶是同一天嗎,驚了」,懷疑二人已經到見家長階段。不過有內地媒體就發文,出口為二人澄清,指楊紫打邊爐係1月5號影嘅,現場冇肖戰,而肖戰食飯則係1月6號影,曲線證明二人唔係撐枱腳。不過四人關係疑幻疑真,唔知到底係緋聞定係真正戀人。