張韶涵晒「大頭相」騷Quali　水嫩肌膚嚇窒網友

台灣歌手張韶涵（Angela）近年演藝事業轉往內地發展，不時登上綜藝秀大展唱功嘅佢，去年更喺內地展開巡迴演唱會，而日前（19日）迎來42歲生日嘅佢，更喺社交網晒出一系列同工作人員、好友慶生嘅靚相，其中零濾鏡嘅特寫相，更係將佢如少女般嘅無瑕肌膚展露無遺，媲美希臘女神般嘅精緻五官更係瞬間引嚟唔少網友留言激讚。

只見身穿黑色吊帶裙嘅佢，襯一件黑色外套，盡晒纖細手臂及白滑長腿外，紮起孖辮嘅佢，望落成個18歲少女般甜美，而其猶如雞蛋般嫩滑嘅零毛孔臉蛋，更係絲毫唔見有歲月嘅痕迹，引嚟唔少網友激讚：「怎麼都沒有變過！」、「仙女下凡！」、「是吃了防腐劑嗎？」、「這狀態真的太好了！」事實上，過去亦有網友拎張韶涵25歲嘅相同依家做對比，唔止五官、肌膚冇乜變化，就連螞蟻腰同腹肌都一模一樣嘅纖幼結實，簡直係凍齡界嘅天花板存在。