名模洪華下腹痛誤診卵巢出血　終證實尾龍骨壓住神經線

郭富城御用排舞師Sunny Wong的模特兒太太洪華（Angela）日前下腹位置突然劇痛無比，無法行路和入睡，嚴重影響生活，忍痛兩日，往醫院求醫，經3日初步檢查後醫生告知是卵巢大出血，要立即住院，她說：「嚇到我死，自己一個去睇醫生揸唔到主意，打畀Sunny商量，佢都嚇親。」Angela以前試過急性腎炎，初時以為患㬾結石，但對卵巢出血有點懷疑：「我前後痛咗5日，如果出血5日應該差唔多無命，之後轉睇另一個老醫生，證實我係尾龍骨老化壓住神經線，食藥和做物理治療會慢慢好。」

是次經驗令她匪夷所思，最慘是延遲了醫治令她多痛了幾天，她形容1至10級的痛，今次達9級痛楚，入院時血壓升至不正常。患病期間老公正值最忙時候，她說：「有一日我要食一種強效消炎藥，食完會好眼瞓，同Sunny講可唔可以陪我，佢話創作緊，走出來就會打斷思路又要成班Designer等，嫁個藝術家老公係咁，惟有自己顧自己啦！」幸得到適當醫治，才無影響生日慶祝。