許光漢獲韓國男神李俊昊請咖啡　網友激動：帥哥大集合

台灣男神許光漢自主演電視劇《想見你》後，人氣紅遍亞洲地區，一舉一動更備受各界關注。而近期前往韓國拍攝電視劇《No Way Out》嘅佢，日前更喺社交網晒出咖啡應援車嘅相，而為佢準備咖啡應援車嘅竟然係韓國人氣男團2PM成員李俊昊，認真犀利。

日前，許光漢喺社交網晒出一張企喺印有自己肖像嘅咖啡車前，並標記韓國人氣男團2PM成員李俊昊，感謝對方。而相中嘅許光漢身穿一件黑色長版黑色羽絨大褸，拎住杯咖啡企喺咖啡車前開心合照，而咖啡車上唔止印有韓國藝人劉宰明及許光漢嘅相，上面仲有用韓文寫道：「我們為劉宰明前輩和演員許光漢應援！」及中文寫道：「演員許光漢加油。」

事實上，許光漢同李俊昊向來感情交好，去年10月李俊昊前往台灣舉辦粉絲見面會時，許光漢就特地送上花籃祝福，李俊昊事後亦晒出2人喺後台嘅合照。如今輪到李俊昊盡地主之誼，送上加油祝福，盡顯2人感情深厚外，台韓2大男神嘅互動，亦引嚟唔少粉絲心心眼道：「不知道該羨慕誰？」、「別爭了，兩個都是我老公！」、「果然帥哥都喜歡跟帥哥一起玩！」