洪天明大仔生日會　將豪宅變動物園原來要用咁多錢

影星洪金寶大仔洪天明同太太周家蔚結婚多年並育有2子，大仔TJ洪大仁日前11歲生日，佢哋為兒子喺屋企開生日派對，除咗有美食同生日布置外，仲請嚟小丑表演搞氣氛，又專誠安排專業飼養爬蟲類動物嘅公司，將豪宅打造成「動物園」，壽星仔TJ被蛇同蜘蛛喺身上爬，又同蜥蜴互動等，玩得相當盡興！

呢次生日會請來大批朋友出席，包括湯盈盈嘅大女錢凱晴同細女錢凱琪外，洪天明嘅韓籍生母曹恩玉都有現身！周家蔚於社交網大方公開呢次生日會使費，原來高達33,000元，果然係花費不菲，不過佢留言話：「孩子們開心是目的，啦啦啦～很開心，很開心。」