楊千嬅「入五」前孖老公行名店　丁子高激罕晒蜜照放閃

歌手楊千嬅自去年5月起到各地舉行巡演，明日（3號）迎來50歲生日嘅佢，日前就趁澳門站開騷前嘅空檔，返到香港同好友提早慶祝生日。佢喺社交網晒出靚相，並表示自己收到好多嘅生日蛋糕同禮物。隨後丁子高仲難得高調放閃，分享同老婆嘅合照，只見丁子高從後攬住楊千嬅，2人頭貼頭相當甜蜜，丁子高更為老婆送上紫色蛋糕及紫色鮮花，周圍布置都係以千嬅最愛嘅紫色為主調，認真有心思！

另外有網友分享自己喺名店偶遇佢哋，晒出同千嬅嘅合照並寫道：「逛街偶遇余春嬌啦！在等SA打包，轉身一看遇到嬅姐和老公逛街，好開心呀，最近我太幸福了吧」睇嚟係相當寵妻嘅丁子高帶老婆到名店揀禮物。貼文曝光後，網友都紛紛直呼羨慕，更大讚楊千嬅保養得宜，完全唔似50歲。