黃紫恩自揭「私影妹」經歷　爆有1造型只準男友影！

無綫J2節目《不正常愛情研究所》前晚(1日)播出一集以「Model圈Secret」為題目，話題相當大膽，貼近三級底線。節目一開始作為主持嘅黃紫恩（JoJo）就率先自揭中學時期擔任過私影模特兒。佢透露當時係經網上應徵入行，「嗰陣認為做私影模特兒好型，啲同學話去溫書，我就話要開工Shooting，而且一個鐘成500蚊，嗰時最低工資都係30、40蚊，覺得識賺錢好叻女。」

談到拍攝過程，佢又透露部分拍友會有特別嘅要求，而自己都會盡量滿足對方︰「佢哋會預備啲制服，問我介唔介意換，但都會提醒我打好底，成班龍友都好斯文，同埋好尊重我。」不過JoJo就堅決表示自己絕對唔會拍泳衣私影，多多錢都唔會接，之後笑稱：「只會留畀男朋友影。」