郭富城讲越南话有难度　林家栋与胡定欣做夫妻叹男人之苦

天王郭富城、林家栋、任贤齐、张可颐及胡定欣等，今晚（3日）到观塘apm出席主演电影《临时劫案》慈善首映礼，场面热闹。可颐于台上受访时，自爆入行以来首次演执法人员，自己对开枪一直很害怕及抗拒，故今次导演对她的开枪戏份不太满意，中间有经过调校。小齐则与家栋埋身肉搏到瞓地，他打趣“仲辛苦过开演唱会”，家栋自爆当初导演要求他“收平啲”﹕“佢话益我有感情线，定欣演我老婆，点知我哋要不停嗌交，真系男人之苦！”

首次饰演悍匪的城城，则指戏中越南话对白最难处理，幸而最终导演收货。受访时问到今次是否很少对白，他坦言：“唔系，只系比小齐同家栋相对少啲啫。戏内小齐演社工，家栋演的士佬，可颐又未演过执法人员，我哋呢个组合好新鲜。”可颐接口笑说：“我真系有开枪恐惧症，呢样嘢控制唔到，今次开工算克服咗，但我要买重保险，点知会唔会有意外，以后仲要拍护肤品广告喎。”3位男主角闻言即谓：“佢未开过枪，我哋仲惊呀，系我哋要买重保险，哈哈﹗”

谈到该片于内地票房已达两亿，城城对香港票房亦有期望：“总之愈多愈好，最好票房加口碑双赢。（返嚟香港谢票？）唔谢嘞，嚟紧都有嘢做，况且之前喺外地谢票，谢完我都谢咗（指生病），可能系演唱会完咗就忙电影宣传，先会有咁嘅情况。（当时家栋扶实你？）佢翘住我啫。”家栋接口：“佢感冒，我哋成日硬食（指担心被传染）啰。”谈到太太方媛日前现身内地节目，透露婚姻生活兼反击网民指她拜金等，城城回应：“有睇（相关新闻）嘅，但唔讲嘞，新年开开心心，咁沉重嘅话题唔答嘞。”

胡定欣在戏中扮演大肚婆，与林家栋演俩夫妻，是她首度跟对方合作：“讲我哋系穷夫妇，顶唔顺个奶奶想搬出去住，同我以往个角色反差好大，尤其拍呢套电影嘅时候，我拍紧剧集《破毒强人》做金融女强人。”她称今次是第二次拍电影，希望有更多登大银幕的机会：“电影导演好锺意将我塑造到同电视剧角色好唔同，我都好锺意，想发掘自己唔同一面，唔想框住自己。”又指自己甚少演喜剧，期望可以一试。另外，定欣透露最近到了埃塞俄比亚探访，感受甚深：“去咗好穷嘅村庄，小朋友穷到连鞋都冇得着。（有冇忍唔住喊？）话畀自己听，就算好感动，都唔应该喺受访者前喊，但都有忍唔住哽咽。”