陳自瑤深水埗行街被野生捕獲　網友激讚：貼地又溫柔

藝人陳自瑤（YoYo）近年榮升成內地帶貨女王嘅佢，人氣高踞不下，而隨着農曆新年到來，日前去咗深水埗行街嘅YoYo亦畀粉絲認出，親民嘅佢亦對粉絲有求必應外，該名粉絲更將同YoYo嘅合照Po上網，興奮道：「在深水埗偶遇女明星了，香港果然遍地都能遇到明星！來深水埗給家裏人買HK的揮春，結果在店裏一扭頭看到一個好眼熟的美女。上前試探性地問『請問是yoyo嗎？』她很溫柔地回答『是』！開開心心與她合影了～她本人真的又溫柔又有氣質！」

而相中所見，身穿紅色冷衫嘅YoYo企喺揮春店前，同粉絲大方合照外，仲相當可愛咁對鏡頭伸脷舉V，引嚟唔少網友激讚可愛貼地。事實上，向來貼地嘅YoYo，早前亦晒出一段喺旺角花園街買嘢嘅影片之餘，之後又畀網友喺尖沙咀偶遇到佢喺行李開倉店買篋，身上嘅黑色雙肩包更係畀眼尖網友發現用咗好多年，認真慳家又貼地。