鍾嘉欣孖老公2人世界　又攬又孭兼坐大髀甜到漏

前無綫花旦鍾嘉欣同老公Jeremy先後誕下兩女一仔，周不時都會帶仔女周遊列國，一家人相當溫馨幸福美滿。今日佢又喺社交網晒出旅行靚相，不過今次就有啲唔同啦，撇甩仔女同老公去咗馬爾代夫歎二人世界。佢喺貼文中寫道：「有史以來第一次！沒有孩子！多謝爸爸媽媽幫我們照顧3個Munchkins，讓我同Jer可以去呢趟馬爾代夫神奇之旅。」之後更透露2人喺馬爾代夫放鬆享受自由嘅時光，做spa、玩浮潛、喺海灘散步，佢直言今次嘅旅程既美妙又浪漫。

相中可見，鍾嘉欣以短褲上陣，大晒一雙白滑美腿，而老公則穿着背心短褲。Jeremy先係從後環抱住鍾嘉欣，之後又孭起老婆對鏡頭大擺勝利手勢，最後鍾嘉欣更坐喺老公大髀甜笑，2人表現相當親密，真係Sweet到爆！