林峯跟隨習俗攝太歲　一喜化三災趁機追多個

藝人林峯婚後每逢農曆年都相當忙碌，既要向父母及親友拜年，又要陪太太返娘家，他更有感而發表示：「以前喺電視台工作，僅得初一至初三唔使開工，平日好少時間留畀家人，每逢過年都會爭取時間陪吓佢哋。」生肖屬羊的他聞得龍年運勢停滯不前，都會根據習俗去攝太歲。正所謂一喜化三災，問到他會否趁機「追多個」，他回答說：「的確有諗過，囡囡都3歲幾，係時候嘞，囡囡話想要個妹妹喎。」

林家比較傳統，林峯有教囡囡大年初一要向長輩斟茶拜年，至於過年習俗，他謂：「一定會買新衫同新褲。（着紅色內褲？）屋企冇呢啲。（今年犯太歲可以沖喜？）又啱喎，哈哈！」談到最難忘的新歲，他笑言：「未結婚時只會休息狂瞓，依家主要係陪小朋友，對住囡囡基本上就精神，佢好黐我哋兩公婆，所以有時候我要做嘢都好唔捨得佢。（囡囡遺傳咗你嘅演藝細胞？）早前我搞Mini concert，佢睇足全晚仲識唱晒啲歌，佢由細到大聽到拍子就會郁。（咁你年底舉行演唱，會父女檔上陣？）唔會嘞，我唔係好想家人同小朋友曝光。」