黃智雯心情靚爆風騷過年　大展舞技送祝福

藝人黃智雯（Mandy）去年年底先後公布婚訊同離巢消息，而今年展開人生新階段嘅佢，先係宣布加盟「凱藝娛樂」成為蔡少芬及朱茵嘅師妹，之後又透露農曆新年後會孖閨蜜團「胡說八道會」去亞洲各地舉行巡唱。

近日密鑼緊鼓練舞嘅佢，昨日（12日）喺社交網大跳賀年舞同粉絲拜年，並寫道：「Dance of the Dragon ，祝大家初三龍精虎猛，日日紮紮跳。本身跳緊首聖誕歌，點知換首新年歌啱咗Bea，多謝你哋陪我癲。」片中只見佢打扮休閒，配上Twins《你最紅》，同髮型師及化妝師一齊扭腰熱舞，活力滿滿嘅佢企喺中間展示自己出色嘅舞姿，伴隨着歌舞現場一片喜氣洋洋，相當有新年氣氛。