張智霖新春開騷唱《冧爆你》：好多auntie派利是祝福我

男神張智霖（Chilam）大年初三已「復工」，於澳門舉行《張智霖幸福時光音樂會》，吸引大批粉絲前往捧場，染回一頭黑髮的他西裝畢挺踏上舞台，獻唱歌曲《冧爆你》時台下反應特別熱烈。談到過年開騷，他笑說：「既開心又感動，因為真係好耐冇同粉絲冇見嘞，我覺得昨晚氣氛好好囉，加上同咁多人一齊慶新歲，喜慶感特別重﹗完騷後有安排合照環節，好多auntie趁機派利是祝福我，好warm呀。」

至於明日情人節，Chilam會再次於當地開騷，完成演出後才返港休息。談到如何為太太袁詠儀製造驚喜，他坦言：「我哋又冇乜形式上嘅嘢喎，反而計畫喺音樂會上唱多啲勁冧嘅歌，要甜到甩牙嘅，都係以娛樂大眾為主啦。」