高圓圓台北被捕獲　愛女樣貌曝光神複製老竇趙又廷

內地女星高圓圓甫出道就憑精緻靚樣搶Fo，並成為圈中公認嘅女神，人氣高踞不下，加上同台籍老公趙又廷即使結婚多年，但仍然甜甜蜜蜜，亦成為圈中知名嘅神仙眷侶。而日前，有網友喺台北公園偶遇高圓圓母女外，仲透露佢哋嘅5歲囡囡性格活潑可愛之餘，外表更神似爸爸趙又廷。

一名網友喺社交網晒出高圓圓母女嘅背影合照，只見高圓圓身穿藍色長袖襯衫，下身搭配啡色鬆身長裙，而囡囡則係相似打扮兼留有一頭烏黑長髮，剩係背影就已經畀人一種亭亭玉立嘅感覺，而該名網友亦透露道高圓圓同囡囡講嘢超級溫柔之餘，囡囡性格亦相當活潑，引嚟唔少網友留言羨慕嘅同時，亦有網友好奇囡囡係咪同爸爸趙又廷一樣單眼皮，對此網友亦大方回應道：「是的，就很像爸爸，但是是可愛。」

事實上，趙又廷曾喺節目上透露過女兒同佢五官神似，乾媽賈靜雯亦表示：「對，你女兒就百分之99.9像你。」令佢懊惱道：「我多麼希望她像她媽！」；有趣嘅係，就連高圓圓都曾認證女兒就係：「紮着辮子的趙又廷。」令外界對高圓圓5歲愛女嘅長相，相當好奇。