林明禎米蘭5度着黑色Bra Top影街拍　獲「護花使者」貼身保護

「馬國女神」林明禎樣靚身材正嘅同時，其22吋纖纖小蠻腰及豐滿上圍，更係圈粉無數。而早前為宣傳新戲留港過農曆新年嘅佢，日前亦去咗米蘭出席時裝周，並喺當地為各大品牌拍攝唔少靚到爆燈嘅街拍相之餘，仲喺社交網晒出幕後辛酸。

只見身穿黑色Bra Top單肩透視裙嘅林明禎，性感得嚟又充滿女人味，然而隨着林明禎嘅舉手投足，身上嘅緊身Bra Top更令佢上圍春光若隱若現，令人大飽眼福嘅同時，認真我見猶憐。另外，隨着林明禎喺社交網晒出幕後花絮影片，並透露道：「5度還有又風又雨，但冷的好值得，好棒的體驗。」只見凍到騰騰震嘅林明禎，雖然每次面對鏡頭都Chok晒甫士，表現專業，不過每次影完相後就會見到一個男仔衝過嚟將林明禎擁入懷，一度令網友誤會係「護花使者」，但睇真啲原來係林明禎嘅細佬。