任賢齊自爆曾遭火藥炸臉險盲　助理反而關心靚女護士

台灣歌手任賢齊出道多年，有唔少膾炙人口嘅歌及戲劇作品外，更係圈中難得嘅好評王，而日前上節目宣傳演唱會嘅佢，更大方分享自己珍藏已久嘅時尚精品，從奢華嘅頸鏈到稀有手袋應有盡有，其中任賢齊親自設計只送不賣嘅銀飾，更係搶盡全場眼光。

節目上，任賢齊向觀眾晒出大量自己珍貴嘅收藏品外，其中任賢齊為演唱會設計嘅經典搭配，引起現場眾人嘅好奇外，向來大方嘅任賢齊，更喺節目現場大方送出一枚親自設計嘅銀戒指及方巾，搞到現場嘉賓紛紛要求任賢齊開放販售，對此任賢齊亦笑笑口道：「考慮看看！」

另外，任賢齊亦分享過去拍攝時遇到嘅恐怖經歷：「當時場景是我拿槍頂着嫌犯問口供，對手要從遠處開槍射嫌犯，槍口小凹槽中有火藥，本來是往前方爆破，但因為演員會掙扎亂動，所以最後火藥直接往我的臉部炸裂！」好彩即時送醫救治，但最搞笑嘅莫過於任賢齊嘅助理，第一時間竟然唔係關心任賢齊傷勢，而係大讚護士好靚女，當下暫時失明嘅任賢齊更笑回：「我又看不到。」