《龍珠》原著鳥山明離世　周潤發曾出演「龜仙人」

著名動畫《龍珠》、《IQ博士》作者鳥山明今日（8日）驚傳離世，終年68歲。而喺國內外都有大量讀者嘅佢，其經典代表作之一《龍珠》，更被荷里活改拍成真人版，其中「龜仙人」一角更由影帝周潤發出演，可惜由於真人版改動太多，加上特效差強人意，飽受劣評。

原本備受期待嘅電影真人版《龍珠》，面世嘅同時亦因特技效果差、大幅修改原着內容嘅關係，被一眾粉絲厭棄兼劣評如潮，堪稱史上最失敗嘅真人電影之餘，喺2016年電影編劇更向《龍珠》原著粉絲道歉。而值得一提嘅係，出演「龜仙人」嘅周潤發，同時更邀請埋上月離世嘅河國榮一齊出演《龍珠》真人版，一齊去墨西哥拍片外，河國榮亦擔任周潤發嘅英文老師。另外，相處期間，周潤發得悉原來河國榮都鍾意唱歌後，更鼓勵對方繼續勇於追夢，直到2018年5月，河國榮終於成功喺九展舉行首個個人音樂會，並喺記招當日重提周潤發鼓勵佢追夢一事，並表示對當年未有喺墨西哥同周潤發合照留念一事，深感後悔。