So Ching退团后激罕受访　走出阿Mo重伤阴霾预告赴美发展

女团COLLAR前成员So Ching（苏芷晴），自男友李启言（阿Mo）2022年因MIRROR演唱会堕屏事故重伤，先系低调照顾男友，后来更毅然淡出幕前，直到去年重操旧业做跳舞导师，并推出翻唱歌曲兼开设个人影音平台转做网红，似乎走出男支重伤阴霾嘅佢，日前更喺网上接受访问，并罕谈近况及心情。

只见So Ching唔止大晒厨艺及派发笑料外，更难得分享近况，透露最近一直教跳舞班，并准备参加一个国际性跳舞比赛，冠军更有望到美国交流，不过当主持问道佢系咪会去美国发展时，So Ching则回应道：“会返嚟㗎嘛！”似乎对冠军志在必得之馀，So Ching亦表示之后都会继续经营个人影音平台。而当被问道如何走出男友受重伤阴霾时，So Ching则透露：“主要都系因为时间……好老土咁讲，时间可以冲淡一切。因为我以前唔信㗎，以前听就会觉得‘你实咁讲㗎啦！’但原来基于呢件事嚟睇，都几套用到。”至于舆论方面，So Ching坦言自己从未理会：“老实讲我系从来冇睇，即系除非真系弹到埋嚟啰，因为我冇开任何通知，冇咩必要都唔会揿嚟睇。有啲留言无论好定坏都会触发到我情绪，但我想自己稳定啲。”

而喺情绪管理方面，So Ching亦坦言会有负面情绪，但愈来愈影响到心理，事关佢自觉生活焦点已有所改变，并回望过去两年，佢透露道：“我觉得话好似发咗场梦好贴切，我觉得最大转变系我个人慢返少少啰！一直都系个好心急嘅人，唔系好谂嘢㗎，简单啲嚟讲即系冇乜用脑。但上年年中打后开始，搵返自己生活节奏，就慢慢知道其实自己系点生活先比较好。”更认同受男友重伤事故影响，令佢急速成长。