田馥甄北海道化身「雪地阿花」　素顏靚樣嚇窒網友

台灣女子天團S.H.E成員田馥甄（Hebe），3月30日將迎來41歲生日嘅佢，一改平時低調作風，晒出多張喺雪地暢遊玩樂嘅靚相，只見Hebe凍到臉紅紅，擺出又喊又笑嘅表情道：「凍歪變阿花。」

最近去咗北海道阿寒湖玩嘅Hebe，日前就喺社交網分享自己見到「霜花」：「能在如此酷寒的特定條件下，觀賞到美麗霜花之人，想必是個幸運的傢伙。」並自嘲係「阿花」：「阿花是在氣溫攝氏零下15度，披星戴月不畏寒風之清晨，於阿寒湖結冰湖面上，為看見大自然精細工藝之華美，頭髮凍成白絲，鼻子甚至腦子皆凍歪之幸運女子。」而素顏上鏡嘅Hebe，雖然塊臉同鼻凍到紅卜卜，但白滑緊緻嘅肌膚，仍然如少女般光彩迷人。