王心凌泉州開騷做啦啦隊熱舞　逆齡狀態被問「貴庚」

台灣「甜心教主」王心凌出道逾20年嘅佢，早前憑《乘風破浪的姐姐》第三季成功翻Hit，事業再創高峰嘅佢，日前喺內地泉州開騷時，竟然化身啦啦隊成員勁歌熱舞，完美演出更引嚟唔少網友質疑年齡：「隨底多大？」

王心凌《SUGAR HIGH 世界巡迴演唱會》9日喺內地泉州開騷，並喺演唱主演偶像劇《微笑PASTA》主題曲《彩虹的微笑》時，換上一套粉紅色啦啦隊套裝，上身露肩嘅設計令佢整體望落性感得嚟又可愛，短版剪裁亦盡騷佢纖纖小蠻腰，下身嘅百褶短裙，更係大晒白滑美腿，少女味濃！而日前，亦有粉絲將王心凌勁歌熱舞嘅片段Po上網，並問道：「王心凌到底多大？以前我還是小孩，她還是那麼年輕；現在我老了，她還是更年輕漂亮。」

事實上，現年41歲嘅王心凌，平時唔止注重外在保養，就連飲食都相當養生；並曾透露過自己長年唔食凍嘢，就連夏天都堅持剩係飲暖水，加上勤做有氧運動、重訓等方式增加新陳代謝，唔怪得佢凍齡靚樣Keep得咁好！