薛家燕自爆同圈外男拍拖　拒再婚生B：我收咗經

女星衛詩雅（Michelle）早前於活動與薛家燕碰面，席間家燕誤把Michelle當作陳家樂老婆連詩雅，合照時更連聲恭喜她有喜，令在場人士捧腹大笑。近日Michelle就邀請家燕為其網上飲食節目任嘉賓，甫到場即裝作神色凝重，並對住家燕說：「我哋之前有啲誤會。」家燕聞言即向Michelle恭喜：「衛詩雅，恭喜你提名最佳女主角，哈哈！」Michelle立即捉着家燕雙手錫錫：「多謝你，家燕姐。」家燕姐重提舊事：「哎呀！真係尷尬，我仲摸你個肚！」

席間Michelle向家燕請教保養秘訣，家燕表示湯水及充足的睡眠十分重要：「我瞓4、5個鐘就夠，但我隨時叉電，即刻可以瞓到，可能係自細養成。」談到感情生活，家燕即展露尷尬又不失禮的笑容說：「有拍拖，有人知道我有個朋友仔細過我嘅，咁我梗係好保護關係啦，因為佢唔係我哋呢行。其實我咁嘅年紀，我唔會諗住再結婚，佢希望想結啦，可能人哋想有小朋友，但係我收咗經啦，我食咗靜心，真係，唔使諗嗰啲，哈哈！」