蕭芳芳愛女開畫展　鄧達智親臨捧場

蕭芳芳的細女張雅琹曾於紐約和倫敦修讀美術，是近年冒起的新進藝術家，日前在港舉行首個個人畫展，芳芳不想搶女兒風頭，開幕禮刻意沒有現身，日前她邀請好友時裝設計師鄧達智（William）睇畫展，她才現身招呼，芳芳當日手抱着愛犬出現，全程笑容滿臉，剛渡過77歲生日的她，雖然有白髮，但精神飽滿。William看過畫展後，大讚雅琹油畫的畫功了得，「佢嘅畫內容和細節充滿幽默感，開幕禮當日已經賣曬，嗰日我去咗泰國，如果唔係都好想訂一兩幅，好鍾意！」他又讚雅琹遺傳芳芳氣質，樣子清秀，散發仙氣，但笑指她嚴重不愛拍照，故沒有合照。

提到芳芳狀態不錯，他透露：「芳芳自從練氣功之後，耳鳴問題有好轉，依家每次外出只需要提前休息一天便可，不像以前出門，前後都要休息幾日。（會否幫芳芳做衫？）特別做就唔會，但之前有幾套做落嘅款式，應承咗會幫佢再做。」又提到芳芳現在忙於「湊女」，就是手中的「細女」愛犬，成為她的掌上明珠。