吳鎮宇削髮為僧照瘋傳　原來入行前曾出家

藝人吳鎮宇入行逾40年，拍過無數電影同劇集，仲曾奪台灣金馬影帝，演技獲得肯定，近年經常北上搵銀嘅佢，最近拍內地綜藝節目《無限超越班2》人氣又再急升，日前網民瘋傳佢早年短期削髮為僧嘅相，仲指佢當年曾3次考無綫藝員訓練班都唔成功，但喺出家修行之後再去考就成功咗，惹起網民熱議！

相信呢張照片係80年代影嘅，吳鎮宇剃光頭身穿袈裟，個樣同依家都冇咩點變，只係睇落比較年輕，網民都大讚佢Keep得好，似食咗防腐劑一樣！其實篤信佛教嘅佢曾透露多年前喺妙法寺出家嘅經歷，不過嗰次只係一次短期幾日嘅修行，而佢早年受訪時亦曾表示考慮喺50歲後出家做一、兩年和尚，不過到咗依家佢都62歲都依然工作不斷，睇嚟暫時都未有出家計劃啦！