黃翠如豪遊台北　踩場殺入舒淇御用套房

藝人黃翠如近日夥拍周奕瑋（Jarvis）及C君齊齊主持無綫綜藝節目《Grand住去台北》，是次除了是三人首度合作外，亦是他們首度體驗包機外遊滋味，期間更有超豪華體驗，如全球最貴價值1萬新台幣（約2,550港幣）的牛肉麵、星級Glamping體驗、台灣米芝蓮一星餐廳，以及到舒淇度假時指定的溫泉套房Room Tour等。

三位主持在節目肩負不同重任，出名記性好的Jarvis，獲安排背誦節目中所有重要資料，而C君除了主持，拍攝過程中更擔任隨團攝影師，為翠如拍下不少靚相，他笑指能夠培養出愛攝影嗜好，全因陪女士購物次數太多：「陪女士行商場經驗我好豐富，呢個亦都令我間接喜歡咗攝影，當佢哋唔知行幾耐時，你就可以影吓商場，又可以影吓唔同擺設，歎下咖啡咁，女士有女士行街時間，我自己又有自己攝影時間。」