洪永城又做老竇即去飲　唔追仔兩個夠晒數

圈中不少藝人今晚（24日）都有現身婚宴賀麥明詩，包括洪永城、唐詩詠、吳業坤、陳庭欣、劉佩玥、戴祖儀與丁子朗等，認真星光熠熠。再做老竇的洪永城，在醫院探望完太太與剛出世的細女後，立即趕來飲喜酒，問到會否向一對新人傳授生仔秘笈，他立即話交畀林盛斌（Bob）負責，並說：「聽講佢今晚都會嚟，Bob勁啲，我老婆仲喺醫院，有過去陪佢過夜，細女英文名改咗，中文名未有，不過師傳話佢條命好，改咩名都得。」

他表示依家最忙是教曉大女兒，知道自己做咗家姐，他說：「不過大女仲細，講咗都唔係好明，雖然未識得呷醋，但都叫妹妹送份禮畀家姐仔，(細女又係Sir face 2.0？)似咩？眼同鼻都似媽咪，似邊個都冇所謂，總之唔係似第二個就得喇！（會唔會再追仔？）兩件已經好夠，再嚟多件就好大負擔。」