星玄｜雙魚女謝安琪獲張繼聰批准　奉旨性感爭「影后」

今日係3月25日，幸運星係雙魚座，助人為快樂之本，幸運之神不會待薄好人。謝安琪（Kay）就係雙魚座，佢近期喺電影界發展成績唔錯，先喺月初憑新片《臥底的退隱生活》，獲邀參展第19屆大阪亞洲電影節，再憑另一套電影《4拍4家族》，獲提名香港電影金像獎「最佳女主角」，老公的張繼聰就表明，當日唔會禁止佢着性感戰衣上陣，因為當日係Kay嘅大日子，咪由佢着囉，你今日得到幸運之神關照，可能影后真係你呢。

今日亦係農曆二月十六，宜嫁娶、理髮、結網，是日最旺生肖係豬，偏財旺利投資，但要懂得見好就收。視帝王浩信就係屬豬，正為無綫新劇《黑色月光》開工嘅佢，趁住空檔把握時間操肌，健身多年嘅佢終有所成，對鏡自拍展示出一雙麒麟臂，難掩澎湃的胸肌，睇到人目瞪口呆，仲話四年前嘅今天正在做gym，四年後嘅今日依然繼續，浩信你投資落自己副Body，記得見好就收，唔好操過龍呀。