關楚耀生日收驚喜禮物　網紅太太獲讚馭夫有術

歌手關楚耀上年喺無綫劇《一舞傾城》演富二代，而成功入屋，其實現實中佢都係富二代，爸爸曾經係唱片公司高層，上年佢同空姐女友Joann結婚，之前試過喺情人節送兩大疊千元大鈔畀Joann做禮物，被網民指炫富！

佢尋日（24日）41歲生日，喺社交網晒咗條片，大晒佢收到太太送畀佢嘅驚喜生日禮物，原來係一部幾千蚊嘅遊戲機，令佢開心到面都紅晒，好似小朋友一樣展現出天真笑容，因為佢想買呢部遊戲機好耐㗎啦，好感謝太太知道佢嘅心意，留言：「我一定會好好善用這份禮物，儀式感滿滿，驚喜萬分，多謝太太#夫妻日常 #生日驚喜。」呢份禮物可謂物輕情義重，網民都大讚佢係好太太，仲好識得綁住男人個心，等老公可以乖乖留喺屋企打機，果然係馭夫有術呀！