陳奕迅內地騷唱出軌歌賀結婚紀念　網友向徐濠縈「告狀」

歌神陳奕迅（Eason）嘅世界巡迴演唱會近日去到西安站，其中一場佢因為見到場內歌迷高舉「無人之境」紙牌，台上表示：「好多人喜歡《無人之境》，我很久沒唱了。」後，就喺第五場彩蛋環節中獻唱《無人之境》。佢仲喺社交網分享有關片段：「陳老闆真的如大家所願Encore唱了《無人之境》🥳 簡直是棒到不想說明，也給不到反應了！😜」

不過有心水清嘅網友就發現，佢唱《無人之境》當日是3月23日，正係Eason同老婆徐濠縈結婚18周年紀念日，而當時徐濠縈去緊滑雪，加上《無人之境》歌詞講述男女大談不倫戀嘅心境，涉及背叛出軌內容，令網友戲稱Eason趁老婆外遊竟公然犯禁，狂留言要懲罰佢：「結婚紀念日唱無人之境，不愧是我們帥陳😂 anyway 臣臣阿徐永遠幸福❤」、「結婚周年挑戰道德底線」有人更tag埋徐濠縈，又去佢社交網留言「告狀」：「我檢舉，你老公結婚紀念日唱出軌歌，能不能罰他給我重唱一遍？」