李美慧貼地賀生日人人讚　孖大一歲繼女打成一片

百億豪門少奶奶李美慧（Vivi）2018年下嫁商人曾文豪後，二人育有囡囡「小糖心」及一子。適逢尋日（26日）係佢37歲生日，佢就連環出Post晒貼地慶生照，身為主角嘅佢更為阿女盡心盡力，打造復活節親子活動，母愛滿瀉！

李美慧分享生日飯局照，並寫道：「生日最開心就係大家一齊，開開心心，身體健康，簡單生活就是最美好的，珍惜！」雖然李美慧升呢豪門少奶奶多年，但佢一直低調又貼地，生日僅同親友簡單食飯，席間獲送上兩個粉色蛋糕及三籠壽桃包，李美慧就同老公曾文豪攬實一對寶貝仔女合照，畫面溫馨。原來佢生日唔係只係自己歎，佢仲為小糖心及一班小朋友提早慶祝復活節，搞咗個尋朱古力蛋之旅，又Book好晒吹氣彈床、瀡滑梯、電動車仔，並上載多張戶外野餐照，留言：「我的生日不只是大朋友，當然少不了一班可愛的小孩子們，多謝你們來參加。希望你們食得開心～朱古力蛋。」

此外，佢同曾文豪及曾文豪與前妻所生、比李美慧大一年嘅繼女曾昭怡等去咗貴州旅行，眾人大合照時，就見到李美慧以素顏上陣，自然大方，全部人打成一片，關係極好。