淡出幕前多年、90年代玉女歌手黎明詩今早（28日）離世，終年58歲。據知她勇敢抗喉癌大半年，不少圈中朋友已收到消息，她今早於睡夢中離開。死訊傳出後，黎明詩個人社交專頁即更新，分享其代表作《Goodbye My Love》，並寫上「Love you all」向樂迷道別，歌詞中的「獨奏一曲再見」、「跟你愉快但太短」及「共你開心愛過 此刻當然有些掛念」正正表達歌迷不捨之情。

其生前好友梁思浩回覆東網，指自己已知道對方離世消息：「對不起，我跟她太多經歷 太多難忘嘅事情 如果我要講，我一定喊到工作唔到！因為我真係好心痛，請大家見諒」他續指：「我其實比你哋更加早就知道，因為我唔喺香港…呢一年裏面其實佢已經好叻好叻，希望大家唔好打擾佢嘅家人，畀啲空間佢嘅家人同埋Kelly（黎明詩同性密友）。喺呢段時間裏面，佢已經好叻去面對，我哋亦好多人去陪佢面對呢件事。我唔識再講啦，因為呢兩日我拍緊廣告，我一路拍，一路同佢家人有聯絡。佢好叻，對朋友非常好，好有義氣，我哋身邊嘅朋友好唔捨得…希望大家掛住佢嘅笑容同埋歌聲！」

於1990年與黎明詩曾合唱過《異性相吸》的張立基表示：「好突然，啱啱過去農曆新年佢仲有喺我哋《流行經典50年》個群組send訊息出嚟，我完全唔知佢有病，對上一次見佢係疫情之前，期間只係喺群組傾偈。黎明詩喺我心目中印象係一個好活潑、爽朗嘅人，希望佢安息！」

另一好友黃翊回應東網，二人曾是師兄妹：「其實我都唔知師妹（黎明詩）有事，我同師妹都有大約兩年左右冇乜碰過面。通常我哋係喺社交網溝通，見到佢出Post就會留吓言。我哋相識係已經80年代末期，大家都係嗰個年代出道，咁喺嗰個時間成日做嘢見到，當年大家都熟。師妹個為人不嬲都好Sweet，佢喺嗰時係個小女神，又靚女啦，又得人鍾意，同埋佢係一個對朋友好好、好熱心幫人嘅一個女仔。今次聽到佢呢個離開，好突然，真係好突然，依家都唔係好接受得到，我都係啱啱有朋友同我講，原來佢係有病咁離開咗，我哋有個『經典同學會』嘅group，我都係喺group度收到佢嘅資訊。」

而好友關寶慧對黎明詩的離世感到當愕然，透過社交平台分享了一張2人的昔日合照，留言悼念：「明明見到你康復的，為何又突然這樣呢？希望你在天堂永遠幸福快樂。」她更附上哭泣emoji和Hashtag了「R.I.P.」、「離苦得樂」、「love you forever」。

何婉盈接受TVB《娛樂新聞台》訪問時，透露去年7月黎明詩曾為她慶生，當時對方已開始消瘦：「佢其實大半年前開始已經開始抗癌，呢排都有去醫院探佢。佢抱一個好正面嘅態度去抗癌，但可能擴散，咁就麻煩啲囉！我哋啲朋友都知，佢呢兩日就走嗰陣都冇咩痛苦，OK嘅，安詳嘅！」她憶起2019年曾跟黎明詩合作開演唱會令她很深刻，可惜那次卻是二人最後一次合作。

另外，莫鎮賢透露黎明詩起初是患食道癌，其後病情惡化，癌細胞擴散導致行動不便：「佢行唔到又唔肯坐輪椅，都係好硬撐，要人扶佢覆診或者做療程嗰陣，都係一個好硬撐嘅人。反而我係好後期先知，可能佢唔想我知，我最後同佢聯絡都係透過電話，當時佢表現畀我睇都仲係OK。」近日，黎明詩病情再惡化，大批朋友趕回港見她最後一面，而黎明詩一直陷於昏迷狀態，直至今日安詳離世。莫鎮賢指黎明詩當晭是笑着離開人世。

黎明詩父親為香港粵劇演員黎家寶。她於1986年暑假期間，在香港獲星探相中，先後拍攝屈臣氏汽水、可樂、巧克力及護髮素等廣告，未幾再獲邀參演首齣電影《代客泊車》。1987年，她參加無綫電視新秀歌唱大賽，1988年參加亞洲電視亞洲太平洋歌唱大賽，及後正式加入娛樂圈，參演數部電影，包括《霸王花》及《獄中龍》。及至1991年推出首張個人專輯《Besame》，獲金唱片成績。同年更獲得多個新人獎，亦因形象健康，獲封「玉女歌手」。

1998年，她下嫁銀行高層Eric Fung後淡出娛圈，惟2017年跟老公分居及離婚，同時出櫃認戀同性密友。