鄭俊弘演奸角高呼過癮　難忘拍攝期間初生子爆「口水肩驚魂」

藝人馬德鐘、黃智雯、張曦雯、羅天宇及鄭俊弘等主演的無綫劇集《再見．枕邊人》，今晚（29日）大結局。劇中奸角鄭俊弘會終極大暴走，擄走黃智雯至荒山野嶺進行報復，並與馬德鐘上演連番激戰。

鄭俊弘對於擔演此角直呼過癮，並坦承尾段演出難度較高：「要Keep住好崩潰、好緊張、好癲喪嘅狀態，要好快由0去到100，需要好多能量，但呢個角色好好玩。」以往大多數演乖乖仔的他，坦言是次演奸角好有得著：「永遠唔可以諗自己係奸，同自己講係好嘅，你就可以好完整同埋將你個角色所做嘅嘢合理化。」

他指拍攝時兒子鄭讚廷（Asher）出世不久，初為人父的他卻要達宵達旦開劇，只能夠透過視像及家用監控鏡頭與兒子「見面」：「記得有一晚開廠，我仔喺床上瞓緊覺，嗰陣佢仲要用口水肩，我見到掛喺佢佢頸上嘅口水肩反起咗遮住佢塊面，即刻緊張到打電話畀老婆，但佢沖緊涼聽唔到，當時好慌好驚！始終啱啱出世幾個月，好彩口水肩好薄，令我感受到做新手爸爸唔可以喺個仔身邊嘅慌忙，依家學識輕鬆啲咁去照顧。」