唐鶴德紀念張國榮離世21年　歌迷獻花悼念

今日（1日）係一代巨星張國榮（哥哥）逝世21周年，於每年哥哥死忌均聚首中環文華東方酒店獻花，並以花海作悼念，故今年也不例外，大批粉絲及途人陸續前來悼念哥哥，現場亦有執法人員維持秩序。

而於酒店門前，來世界各地的哥哥粉絲送來花牌，當中不少花牌頗有心思，既有花朵砌成的心形狀、亦有以哥哥英文名字Leslie的L字形，以及蝴蝶、月亮等花牌、手繪肖像畫、《霸王別姬》造型照及多隻手摺的紙鶴。

而哥哥生前摯愛唐鶴德（唐唐）上載哥哥舊電影《阿飛正傳》片段，片中哥哥對鏡頭講：「我咩都唔想要，淨係想要你留低。」絕對係唐唐最想同哥哥講嘅一句說話，亦透露出佢對哥哥嘅無限思念。而今年剛好哥哥死忌同復活節重疊，令唐唐有感而發寫下：「今天是復活節 真的嗎？」另外多位圈中人如蔡卓妍、古巨基、袁詠儀、鍾鎮濤、劉培基等，亦先後發文悼念。

而王力宏亦公開認識哥哥嘅經過，佢透露1999年搬去香港拍電影、製作唱片，人生路不熟、語言亦不通：「一晚，我去跑馬地聽唱歌。可能是音樂氣氛太吸引人，我情不自禁地上台伴奏和演唱。突然，另一位客人也上台了，他正是張國榮。他提議與我合唱一首他非常喜歡的歌──艾頓莊強（Elton John）和喬治麥可（George Michael）的《Don’t Let the Sun Go Down on Me》。我對這首歌很熟悉，因為前兩年我曾訪問過艾頓莊強。這或許讓哥哥對我印象深刻，隨意點的一首歌我都能應對自如！那次的即興合作拉開了我們友誼的序幕。他開始叫我『Kid』，而我叫他『Uncle Leslie』。」

王力宏親筆寫下對哥哥嘅思念，感恩當年做過張國榮巡迴演唱會《Passion》嘉賓，又參演過對方執導嘅電影《煙飛煙滅》：「哥哥對每一個細節都異常在意和認真。他是第一位讓我深刻理解到：尊重自己的作品，你的作品才可能被外界尊重。」

佢提起當年哥哥曾自豪地向佢展示家中衣櫥，入面就係當年為巡演而特別由品牌設計師另外設計嘅服裝，因融入了美國印第安人元素，包括長髮假髮，令哥哥既興奮又感到沮喪，可惜造型最後被外界評為「人妖」。王力宏不禁感嘆：「深愛其作品的藝術家，愈是愛，愈是容易被傷害。哥哥對每一個作品投入了最多的愛和Passion，把自己的作品愛到甚至像自己的小孩一樣，因此被批評或攻擊時怎麼可能不放在心上？這讓我意識到，對一個藝術家來說，需要保持一個矛盾的狀態：全心全意地愛自己的作品，但同時又不能對外界的批評過於在乎。這是很複雜的平衡，難以達到但又必須追求。」

佢又提到兩人友誼雖然僅有短短4年，但嗰段時光佢哋成日見面，多次出入哥哥同唐唐屋企，大談音樂、表演、唱歌和音樂劇。王力宏覺得要真正了解哥哥，最好方式係通過佢嘅作品，特別係佢喺《霸王別姬》中飾演「程蝶衣」，嗰份對藝術嘅執着同熱情，正係哥哥真實寫照，對每一件作品嘅態度。

王力宏亦有對哥哥嘅最後說話：「我想念你，也愛你，Uncle Leslie。謝謝你教導我這麼多，並待我如家人，願上帝保佑你，使你充滿平靜。（I miss you and love you, Uncle Leslie. Thank you for teaching me so much and treating me like family. May God bless you, and fill you with peace.）」

另外哥哥初戀女友倪詩蓓，最近受訪時自爆當初得知哥哥死訊後，係以為講笑，仲好嬲朋友亂傳消息：「我先收到電話，嗰日4月1日，我以為講笑，所以好嬲。我同我朋友講『你無啦啦點解要講佢，同埋講呢種事。』之後睇新聞證實了。喺我心目中，哥哥只係出國，去咗第二個地方。」佢更惋惜表示哥哥當年曾送畀佢一隻戒指，可惜因不停搬屋，早年已唔見咗。

陳秋霞近日接受訪問時表示，自己為哥哥作了一首歌，但一直都未有推出：「我喺當年嘅4月2日，為哥哥作咗一首歌，歌詞都係我自己寫，但係每當我想唱呢首歌，我都好難控制自己嘅情緒，所以呢首歌一放就放咗21年。我希望有一日我會控制到自己嘅情緒，可以將呢首歌唱畀佢聽，不如就今年9月？等我練習吓，我諗我一定做到。」

周慧敏亦曾與張國榮在電影和電影上合作：「喺現實上，佢好似哥哥咁，喺工作上畀咗我好多意見，嗰陣我想出一本純影寫真集，佢都鼓勵我，叫我一定要出，結果我推出咗第一日同第二本。哥哥仲試過寫過歌畀我，呢件事都令我好意外，聽到佢用錄音帶，哼咗《如果你知我苦衷》嘅DEMO畀我，可惜我搵唔番呢個版本，如果我有留低，可以做一個紀念。」