甄妮批古淖文油膩誇張　羅啟豪撐師弟：佢當晚表演好好

《中年好聲音》羅啟豪今天（2日）趁自己40歲正日生日，到新城廣播宣傳新歌《相信相信》，獲數十粉絲於門外為他慶祝，相當窩心。他表示推出新歌等同夢想成真，亦希望藉新歌令大家「相信人生每一步都可幫助達成夢想」。當談到生日願望，他直言希望新歌大熱，以及可以舉行演唱會。

談到《中2》三甲人選，羅啟豪直言：「本來我睇好譚輝智奪冠嘅，因為我同佢合唱過，私心偏向佢。」至於可有留意前輩甄妮批評冠軍古淖文「油膩誇張」，他回應：「都有睇到，覺得每個人都可以有自己嘅意見。甄妮係好有經驗嘅歌手，無論正評或負評，所有歌手都可以吸收令自己更進步。我覺得古淖文當晚表演好好，當然進步空間一定有。」