傅穎忽然簽緋聞男友公司　400萬豪車任坐入住複式靚屋

長駐上海發展兩年嘅藝人傅穎（Theresa），曾指早年喺廣州生活期間長期受到失眠困擾，所以佢先轉去上海，但原來佢輾轉下又再返到去大灣區，因為佢偷偷加盟緋聞男友胡清藍開設嘅公司，仲返去東莞定居。

日前胡清藍上載影片，並宣布傅穎正式加入公司，佢仲親自揸售價逾400萬豪華車去機場接傅穎。其實胡清藍近年同老婆「牙縫姐」積極直播帶貨，喺平台坐擁超過142萬粉絲，人氣強勁。胡清藍同傅穎相識近20年後再度合作，除了親自接機，仲安排佢入住複式豪宅，簡直係絕世好老闆。

片中所見，大屋豪華又有Sense，胡清藍提前將傅穎嘅證件相錄入系統，所以傅穎入𨋢後連掣都唔使撳，因為部電梯已自動識別佢要去嘅樓層，相當高科技！而傅穎入住嘅豪宅係複式設計，屋內設有旋轉樓梯，大廳樓底極高，空間闊落，牆身同地磚都採用雲石。胡清藍更親自幫傅穎隻愛貓砌貓架，又笑言：「呢個老細做得好卑微呀。」