《愛．回家》保安部鬧不和　「鐵面陳」搞乜10度跑飛鵝山？

處境劇《愛．回家之開心速遞》捧紅唔少演員，近日「鐵面陳」王致狄終於再有主線劇情，講到鐵面陳因久下人情債，而連累保安部繼而爆不和，其中一幕一眾演員更要上飛鵝山跑步，王致狄接受東網訪問透露當日氣溫只得10度：「其實嗰日早上就係今年最凍嘅日子，好似得10度，咁我哋一班同事都以為嗰日上山就真係好凍啦，我哋就準備充足帶晒暖包，有啲同事仲着咗保暖內衣同埋禦寒用嘅貼身長內褲，點知中午上到山頂上面竟然出太陽，溫度仲突然飆升到十七八度，搞到大家都拍到流晒汗，簡直天氣不似預期，逼出咗我哋嗰日拍攝嘅熱情出嚟。」

講到劇中鬧不和，王致狄就表示戲外大家相當老友：「當然現實生活中我哋一班保安部嘅同事都非常之老友，因為我哋一齊拍愛回家之開心速遞都已經有一段長嘅時間，建立咗有一定嘅默契同埋信任，所以大家都拍攝得好開心，最緊就係我哋繼續一直可以拍落去。」