陳豪一家五口深圳被捕獲　兒子亂入搶鏡

視帝陳豪與老婆陳茵媺係圈中模範夫妻，婚後育有2仔1女，一家五口生活美滿，今個月初陳茵媺43歲生日，請嚟大班好友到家中開P慶祝，近日佢哋趁住假期，一家人到深圳玩，仲被網友捕獲佢哋去咗歎美食。

有網友於社交網大晒偶遇陳豪一家五口嘅相，睇到陳豪兩公婆非常親民，網友要求簽名和合照都有求必應，網友大讚佢哋全家人顏值都好高，同埋好Nice，而8歲孻女Camilla就同媽咪十足餅印一樣，相當可愛，而網友與陳豪合照時，兩個仔在爸爸身後亂入大擺搞鬼表情，搶晒鏡呀！