星玄｜双子女吴若希面肿变样　吓坏网民：以为系杨紫琼

今日系4月8日农历二月三十，双子座系幸运星，生活称心冇烦恼，要识得感恩同知足。“双子女”吴若希（Jinny）上个月孖萧正楠同朱敏瀚，一齐赶拍新剧《奔跑吧！勇敢的女人们》，仲去咗粉岭一间庙入面进行拍摄，剧中Jinny饰演萧正楠嘅老婆，不过因为萧正楠出轨，爱上“小三”赖慰玲，搞到两个人要离婚，Jinny受访嗰阵就话，最辛苦系拍离婚戏份喊到眼肿，跟住被问有冇谂过，如果发生喺自己身上会点处理，Jinny即刻话阿妈教落，做女人要靠自己，所以相信可以坚强面对同处理，之后仲笑话拍完套剧就要回归家庭，因为要抽多啲时间去陪吓囡囡，Jinny真系生活称心冇烦恼。

曾经答应连续30日更新社交网嘅Jinny，近日快闪北上广州，为全新主题嘅巡回音乐会做准备，心情大靓嘅佢连日晒出多张靓相，其中一张见到Jinny双手托住下巴，但见到佢面肿肿，搞到个样完全唔同，唔少网民见到之后都纷纷留言：“以为杨紫琼”、“唔同咗嘅！有点儿似谭嘉仪！本身已经够靓”，甚至有网民耻笑系透明质胶。不过向来吃得开嘅Jinny一于懒理，寻晚返到香港即刻出新po，话自己终于可以休息吓，只系希望今日唔好有任何人任何动物任何电话任何事嘈醒佢，实行好好“避世”叉电。

是日最旺生肖系猪，工作上独当一面，表现令人刮目相看。众所周知“猪仔”周奕玮（Jarvis）喺今年初嘅颁奖礼入面，成功夺得“最佳男主持”，其实Jarvis一直系无綫嘅日本通，主持过无数日本旅游节目，2022年无綫台庆颁奖礼，Jarvis亦担大旗“单拖”做主持，唔少观众大赞佢做得出色，Jarvis你嘅努力同表现，大家都会睇得到。