何廣沛着印女友名字球衣放閃　英國睇波順便影婚照？

藝人何廣沛出名係英超足球隊「紅魔鬼」曼聯嘅死忠球迷，佢尋日（7日）孖任職公關嘅女友Sarah Mui去咗英國，睇曼聯主場迎戰死敵利物浦嘅英超比賽，親身入場支持愛隊，心情當然非常興奮，喺場內係咁拍片同影相，紀錄現場嘅精彩時刻！

而當中最Sweet嘅係，何廣沛着住果件曼聯7號球衣背後，係印咗女友Sarah個名㗎，真係閃暈網民呀！而網民見到佢哋愛得咁甜蜜，都紛紛問何廣沛係咪已經求婚成功，呢次英國之旅隨便影埋婚紗相？有網民仲好羨慕何廣沛，可以搵到個可以陪自己睇波嘅另一半添！