懶理破冰爛尾！楊愛瑾孖索爆人妻　組家庭團遊蘇梅島

前Cookies成員楊愛瑾（Miki）2016年同永安集團太子郭永淳，先後誕下一仔一女，之後佢逐漸淡出幕前，專心照顧家庭，過闊太生活。楊愛瑾去年同傳不和嘅吳雨霏（Kary）同場現身鄧麗欣（Stephy）嘅演唱會，原以為二人已正式破冰，點知早前區文詩生日，再次出現三缺一嘅局面，楊愛瑾並未現身一齊慶生。

不過朋友多嘅佢相信都唔在意呢啲，近日喺社交網分享多張蘇梅島之旅嘅靚相，原來今次佢係組成咗一個家庭旅行團，除老公郭永淳、大仔Luken同細女Emma之外，仲有富貴人妻譚凱琪及陳逸寧等多個家庭一齊出行。咁多位索爆人妻以泳裝上陣，盡騷火辣身材，仲坐喺吊床上傾偈睇風景，相當寫意。