廖子妤金像獎難搶衫　戰衣唔啱身驚跣落嚟走光

藝人廖子妤、栢天男今日（9日）於上環出席活動，今年有份角逐香港電影金像獎最佳女配角的廖子妤（Fish）揀衫愛計五行屬性，問她可有為金像獎戰衣計算一番？她笑言：「其中一件都符合，但因為太重，未知自己Fit唔Fit到，Fit唔到就會跣落嚟⋯（性感的？）我咁瘦都唔會有咩睇㗎啦，我賣骨感㗎嘛！」

子妤還指因臨近金像獎，所以女星出現「全城搶衫潮」好難借衫，Fish謂：「依家個個都係度搵緊衫。（有冇人同妳搶？）你哋講得出名嘅都搵緊。（跟妳合作電影《毒舌大狀》嘅王丹妮有冇同妳爭？）冇，但明嘅，又轉季又要借衫做訪問，所以難借到。」

Fish男友盧鎮業（小野）有份角逐金像獎影帝，Fish指無意與男朋友一起行紅地氈：「成日對住，我想同番自己嘅電影團隊行。」小野於新劇《瑪嘉烈與大衛系列 絲絲》與吳啟洋（Phoebus@P1X3L）有咀戲，問Fish之後可有拒絕比對方錫錫？她謂：「我都有同其他人拍咀戲，打平，做演員係咁㗎啦。」栢天男早前到法國拍戲，問他可有艷遇？他笑指因言語不通很難溝通，故只能專心拍戲。