东网电视
更多新闻短片
16岁仔玩母子恋，唔系呀？系呀，谢霆锋、张栢芝所出的大仔Lucas，惊传恋上46岁女滑雪教练，仲共赋同居，激到栢芝扎扎跳！呢个古仔够晒Juicy，不过几位主角至今冇回应，而且传闻由内地传出，似乎唔多可信喎。
当然，世事无奇不有，尤其老窦霆锋一样爱上大自己11岁的王菲，而阿爷谢贤的女友则细自己几十年，Lucas会唔会“遗传”父系“传统”，好难讲得埋。之不过，若以常理推测，就算Lucas要玩姊弟恋，都唔使搵个40几岁、仲老过自己阿妈嘅婶婶啫，唔通真系老藕驱风咩？
嗱，呢单奇闻原来又系由内地传出。话说霆锋旧年带Lucas一齐去澳洲滑雪，共敍天伦，同行正正有一位40多岁的女滑雪教练。就系咁，内地一位博主绘声绘影指出，Lucas同女教练陷入热恋，仲唔理阿妈反对住埋一齐，系真爱咁话！
内地传闻有几多成真，大家心中有数。好似内地去年传出，梁朝伟喺日本金屋藏娇，同内地女星程潇仔都生埋，结果唔止程潇批评传闻假得离谱，伟仔仲罕有发出声明，直斥恶意造谣，扬言采取法律行动。又好似再早前，内地竟然传闻周慧敏离婚、罗嘉良生癌、梁洛施同王杰结婚，全部都被当事人严正否认。
所以话啫，Lucas由学滑雪变成同女教练同居，孰真孰假，大家应该心中有数。至于栢芝，的确好耐冇蒲头，连社交网都冇乜更新，难怪被传病咗入院。但与其话佢畀阿仔激亲，倒不如循其他方向谂。此前已有传栢芝再次大肚，佢向来母爱泛滥，唔通系坚嘅？
霆锋与栢芝的旧事仍不时被提起，现在连大仔Lucas的一举一动都备受关注。
