李元元做球童跳開花舞唔怯場　媽媽大爆幕後「牛雜事件」

一連三日嘅七欖賽事已經圓滿結束，吸引唔少球迷及藝人撐場，賽事氣氛相當熱鬧，日前Lucy媽梁志瑩（Sophia）喺社交網晒出Lucy做開球禮球童嘅片段，雖然Lucy人仔細細，但一啲都唔怯場，仲現場大跳「開花舞」，獲得全場觀眾為佢歡呼打氣，認真犀利！就連Lucy媽都表示相當佩服囡囡有壓場感，即使有咁多人望住都可以表現得揮灑自如。

而Lucy媽亦大爆幕後發生咗「十蚊牛雜事件」，原來當時為Lucy準備嘅襪大到腳踭位上咗小腿，媽媽惟有拎鉸剪將對襪逐啲逐啲咁剪開，好似剪緊牛雜，雖然最後Lucy嘅腳趾全部露出，但佢依然笑容滿面，被網民大讚從容淡定，咁樣都冇投訴。