范冰冰泰國化身富貴千金　37度玩足4粒鐘狂標汗

內地女星范冰冰最近應泰國旅遊局邀請出席泰國潑水節（又稱宋干節），順勢宣傳潑水節活動，好自然佢就換上泰國傳統服飾，襯上佢白滑雪肌，簡直係美出新高度。但佢要喺37度高溫下要玩足4粒鐘，雖然造型靚靚又養眼，不過佢都搞到狂標汗，係咁要拎紙巾抹、風扇吹，網民都戥佢辛苦！另外，網民發現范冰冰坐的車不夠氣勢，仲出現漏油情況，相比起其他泰國女藝人坐的花車較為寒酸，最怕有比較。

有網民就認為今次冰冰參與嘅盛事似足鄉鎮活動，質疑佢嘅身價唔應該參加呢類型活動，竟然要去賺呢啲吃力不討好嘅辛苦錢，令人心痛。亦有網民問今次活動佢到底收幾錢薪酬，雖然要紆尊降貴，但都證明佢夠貼地，同泰國人一齊慶祝佳節。

見佢最少換上兩個仙氣造型，當中金色貴氣Look睇到人目不轉睛，因為佢身上有有大量金珠繡花，頭上又戴金葉配飾，加上完美妝化，真係似足混血泰國千金。佢另一個Look就down to earth得多，以藍色偏中式小棠裝嘅打扮，配上柔順長曲髮，柔美造型突出仙氣，佢仲走到去攤檔隊冰凍椰青，搞到攤檔阿伯流晒口水咁一直偷望佢，欣賞呢種難得一見嘅絕頂美人。