金像奖2024︱余香凝争影后唔紧张　廖子妤战袍斗性感

艺人余香凝、廖子妤及泰籍男神Win Metawin现身铜锣湾出席品牌活动，吸引大批粉丝于场外守候，逼爆现场。余香凝及廖子妤齐齐受访，谈到后日举行的金像奖颁奖礼盛会，二人分别入围角逐“最佳女主角”及“最佳女配角”，前者表示：“因为每日都忙，感恩好多工作，兼且囡囡又好精灵活泼，每日都要陪佢玩，用尽晒啲精力，所以都冇时间紧张。”

而廖子妤除自己入围外，男友卢镇业同时入围角逐影帝，她笑说：“本来都还好，但时间愈嚟愈近，都真系有种紧张嘅感觉，不过今次好多认识嘅朋友都有入围，女主角我紧系想余香凝攞啦，无论边个攞都值得饮番杯，嗰晚应该会好易饮醉，开心。（如果你同余香凝一齐攞奖呢？）哗，咁真系值得纪念嘅一日，到时应该呕到癫咗！”

谈到有指当初电影《白日之下》女主角原属意卫诗雅，余香凝大方回应：“我有睇过相关嘅报道。多谢整个创作团队咁多年嚟冇放弃过（开拍），即使搵到投资者然后又被拒绝，佢哋都继续，中间经历咗好多，终于做到出嚟，而观众都睇到我哋想讲嘅嘢，其实系好难得。当初我接到嘅系试镜嘅邀请，好多演员包括廖子妤都有份参加，可能编剧觉得我嘅质地比较符合呢个角色，我觉得自己比较幸运。”廖子妤接口：“我去试镜嘅时候都磨拳擦掌，好想得到呢个角色，唔紧要啦，下次赢番佢，角色会搵演员，呢啲系缘分。”余香凝回应：“都唔系嘅，有阵时廖子妤会赢我，佢嘅外表比较型格，有啲角色比较啱佢。”

至于后晚战衣，余香凝笑言自己比较保守：“其中一件透透哋，冇嘢露，我只系露齿！”反而廖子妤即搞笑说：“我性感，咩都露，因为我好想做性感女星，只系从来都冇人觉得我性感啫，其实性感系一个好高级嘅赞美。（再拍裸露戏？）性感同裸露系两码子嘅事，但如果剧本好，我系唔介意（裸露）嘅。（依家有男友喎。）唔惊，佢都系演员，而且我都系人一个，身体又唔系特别精彩！”